Գիլ Շահամը ծնվել է 1971 թվականին ԱՄՆ-ի Իլինոյս նահանգի Շամպեյն-Ուրբանա շրջանում։ Հետագայում ընտանիքի հետ տեղափոխվել է Իսրայել։ Ստանալով Ամերիկա-իսրայելական մշակութային հիմնադրամի ամենամյա կրթաթոշակներ՝ Շահամը 7 տարեկանում ընդունվել է Ռուբինի անվան երաժշտական ակադեմիա, որտեղ աշակերտել է Սեմյուել Բերնստայնին։ 1981 թվականին նա դեբյուտային ելույթները է ունեցել Երուսաղեմի սիմֆոնիկ նվագախմբի և Իսրայելի ֆիլհարմոնիկ նվագախմբի հետ։ 1982 թվականին Շահամն արժանացել է Քլերմոնտի մրցույթի առաջին մրցանակին։ Ապա ստացել է Ջուլիարդյան դպրոցում սովորելու կրթաթոշակ, ուսումը շարունակելով նաև Կոլումբիայի համալսարանում։ 

Գիլ Շահամը հանդես է եկել Բեռլինի ֆիլհարմոնիկ, Բոստոնի սիմֆոնիկ, Չիկագոյի սիմֆոնիկ, Իսրայելի ֆիլհարմոնիկ, Լոս Անջելեսի ֆիլհարմոնիկ, Նյու Յորքի ֆիլհարմոնիկ, Փարիզի սիմֆոնիկ, Սան Ֆրանցիսկոյի սիմֆոնիկ նվագախմբերի հետ, եղել է Մոնրեալի, Շտուտգարդի և Սինգապուրի սիմֆոնիկ նվագախմբերի ռեզիդենտ մենակատար։ Նվագախմբերի հետ Շահամը շարունակում է աշխատել իր «1930-ականների ջութակի կոնցերտները» շարքի վրա, որը ներառում է Բարբերի, Բարտոկի, Բերգի, Կորնգոլդի, Պրոկոֆևի և այլ կոմպոզիտորների ստեղծագործությունները:

Գիլ Շահամը թողարկել է երկու տասնյակից ավելի կոնցերտային և մենահամերգային կատարումների ձայնասկավառակներ, «Գրեմմիի» բազմակի մրցանակակիր է, արժանացել է նաև Grand Prix du Disque, Diapason d’Or և Gramophone Editor’s Choice մրցանակների։