Մաքսիմ Ռուբցովը Ռուսաստանի Դաշնության վաստակավոր արտիստ է, Ռուսաստանի ազգային նվագախմբի (գեղարվեստական ղեկավար՝ Միխայիլ Պլետնյով) ֆլեյտահարների խմբի կոնցերտմայսերն ու առաջին ֆլեյտահարն է, «RNO Wind» կվինտետի ղեկավարն ու հիմնադիրը։ Ռուբցովը պետական և միջազգային հեղինակավոր մրցանակների դափնեկիր է, մանկավարժ, պրոդյուսեր, “Yamaha” արտիստ։

Վիրտուոզ ֆլեյտահարի իր երաժշտական տաղանդի և անձնական խարիզմայի շնորհիվ Մաքսիմը գրավել է շատ հանդիսատեսների սրտեր։ Նրա երկացանկը բազմազան է ու եզակի՝ դասական երաժշտություն, նվազ հայտնի գործեր և փոխադրումներ, ժամանակակից դասական երաժշտություն, ջազային ստեղծագործություններ և իմպրովիզներ: 

Մաքսիմը որպես մենակատար ելույթ է ունեցել մի շարք նվագախմբերի հետ, որոնց թվում՝ Սան Ֆրանցիսկոյի սիմֆոնիկ նվագախումբը (ռեզիդենտ ֆլեյտահար), Ռիշոն Լեզիոնի սիմֆոնիկ նվագախումբը, Մոսկվայի պետական նվագախումբը, Սիբիրի սիմֆոնիկ նվագախումբ և այլք: Անվանի նվագախմբերի հետ նրա համերգներն ու մենահամերգները կատարվել են աշխարհի լավագույն համերգասրահներում։ 

2018 թվականին տեղի ունեցավ Մաքսիմի դեբյուտային մենահամերգը Նյու Յորքի պատմական «Քարնեգի հոլ» համերգասրահում։ Մաքսիմը նաև ձեռք է բերել մանկավարժի բարձր համբավ և պարբերաբար հրավիրվում է վարպետության դասեր անցկացնելու ամբողջ աշխարհում: